Býarrætturin í Keypmannahavn: Heimsins elsta tatoveringsbúð skal ikki lata aftur

Býarrætturin í Keypmannahavn hevur í dag avgjørt, at 135 ára gamla tatoveringsbúðin, Tatoo Ole í Nyhavn, kann halda fram við sínum virksemi.

Tað er føroyska Majbritt Petersen, ið eigur Tattoo Ole, sum hevur hildið til á adressuni Nyhavn 17 síðan 1884, og er hetta sostatt heimsins elsta tatoveringsbúð.

Majbritt hevur ligið í sakarmáli við útleigaran, sum eigur húsini á Nyhavn 17, síðan summarið 2017, og í dag fall dómurin: Tattoo Ole nýtist ikki at lata aftur.

Útleigarin hjá Majbritt Petersen eigur eina matstovu, Brasserie Nyhavn 17, og hann ynskti at uppsiga leigumálið hjá Majbritt, so hann kundi fáa sær størri køk.

Men Majbritt hevur stríðst fyri at sleppa at vera verandi. Á middegi í dag fall dómurin, og tað merkir, at heimsins elsta tatoveringsbúð framhaldandi kann húsast í kjallaranum í Nyhavn 17.

- Vit hava vunnið. Tað er super lekkurt og kundi ikki verið betri. Nú sleppa vit at varðveita eitt petti av danskari heimsmentan, sigur Majbritt Petersen við TV2 Lorry.

Sum vinnuleigari hevur mann eina verju móti uppsøgn, serliga tá handilin er gamal, og tí endaði málið í býarrættinum í Keypmannahavn.

Síðan 1884 eru nógv fólk komin inn á gátt í Nyhavn 17 at fáa sær tatoveringar, og Tatoo Ole er ikki bert fyrsta tatoveringsbúðin, sum lat upp í Nyhavn, men eisini tann fyrsta í øllum Norðurlondum. Harafturat er búðin tann seinasta, sum er eftir í Nyhavn.