Bygdaráðslimur mótmælti, at hann var vístur av fundi – men fekk ikki viðhald

Um ein kommunustýrislimur er ógegnigur í einum máli og hevur biðið eykafólk umboða seg á fundi, so kann viðkomandi kommunustýrislimur ikki vera til staðar, tá málið verður viðgjørt.

Heldur ikki um talan er um almennan bygdaráðsfund.

Hetta er niðurstøðan hjá Kommunala eftirlitinum í einum klagumáli, har ógegnigi býráðslimurin kærdi um, at borgarstjórin hevði biðið hann fara út tá málið varð viðgjørt, hóast hann sat á áskoðaraplássunum á almennum kommunustýrisfundi.

Tað er Skálavíkar kommuna, sum kunngerð niðurstøðuna hjá Kommunala eftirlitinum.

Tað var á einum býráðsfundi í heyst, at borgarstjórin í Skálavík bað bygdaráðslimin, ið var ógegnigur um at halda seg uttanfyri, meðan málið varð viðgjørt á almennum bygdaráðsfundi.

Bygdarráðslimurin var sjálvur klagari í einum máli um byggisamtykt, og hevði tí ikki gegni til at vera við í viðgerðini av málinum.

Við heimild í Kommunustýris- og Fyrisitingarlógini hevur Kommunala eftirlitið givið borgarstjóranum í Skálavíkar kommunu viðhald í, at hann hevði heimild til biðja kommunustýrislimin fara av fundi meðan málið varð viðgjørt.

Frágreiðingin hjá Kommunala eftirlitinum sæst her