Carrie Lam fer frá í summar

Politiski leiðarin í Hong Kong, Carrie Lam, fer frá í summar.

Hon upplýsir í dag, at hon eftir fimm ár sum leiðari ikki ætlar at sita enn eitt fimmáraskeið.

Grundgeving hennara er, at familjan hevur hægstu raðfesting, og familjan heldur, at tað er tíð til, at hon kemur heim, sigur hon.

Ritzau endurgevur lokalar miðlar, sum skriva, at John Lee, sum er virkandi ovasti leiðari, tá Carrie Lam er burturstødd, fer at royna at gerast eftirmaður hennara, men tað er tó ikki váttað.

Leiðarin í Hong Kong verður valdur av einari valnevnd við 1500 limum, ið sum heild stuðlar stýrinum í Kina.

Carrie Lam er 64 ár. Í 2017 gjørdist hon fyrsti kvinnuligi leiðarin í søguni hjá Hong Kong. Valskeiðið hjá henni endar 30. juni, og 8. mai verður greitt, hvør nýggi leiðarin verður.