Alda Nielsdóttir
Á hvørjum ári verða yvir 11 mió. skógvaeskjur latnar børnum í 130 londum. Tað eru sjálvbodnir felagsskapir úr bæði USA og Evropa, ið savna eskjurnar, og aftur í ár sendir Christmas Child eisini eskjur úr Føroyum.
Í ár fara eskjurnar til Moldova, ið er eitt tað fátæksta landið í Evropa.
Síðan 2003 eru eskjurnar úr Føroyum annars farnar til Rumenia, men soleiðis verður ikki í ár. Orsøkin er, at føroyingar senda eskjur gjøgnum Ongland. Støðan viðvíkjandi Onglandi og ES er í løtuni ógreið, og eftirsum at Rumenia er eitt ES-land, hevur nevndin í Onglandi gjørt av, at eskjurnar tí ikki verða sendar til Rumenia í ár.
Sambært Christmas Child Føroyar eru føroyingar teir, sum geva mest í prosentum í mun til fólkatalið, og seinastu tíggju árini hava føroyingar latið yvir 4000 skógvaeskjur á hvørjum ári.
Í fjør vórðu 4064 skógvaeskjur latnar av føroyingum.
Seinasta freist at lata eskjur inn hesaferð er um eina viku, sunnudagin 27. oktober.
Meira kunning fæst á heimasíðuni hjá Christmas Child Føroyar.
Vinarliga broyt tínar kennifíla - og privatlívsstillingar fyri at síggja hetta innihald