Danmark byrjar umfatandi koppsetingarætlan móti apupokum

Koppsetingartilboðið verður nú víðkað til eisini at verða boðið monnum, ið hava kynsligt samband við aðrar menn

(Mynd: EPA)

(Mynd: EPA)

2022-08-10 14:26 Author image
Ingi Samuelsen
placeholder

Danmark tørvar 10.000 vaksinuskamtar móti apupokum afturat, metir Statens Serum Instut, SSI.

- SSI hevur í løguni 2.700 skamtar á goymslu. Vit arbeiða við at fáa 10.000 afturat innan fyri komandi vikurnar, sigur Statens Serum Institut í einum skrivligum svari upp á fyrispurning frá Ritzau.

Danska heilsustýrið víðkaði í gjár málbólkin, so tað ikki bert eru nærsambond til smittað, sum nú fáa koppseting í boði.

Vaksinan verður eisini bjóðað monnum, sum hava kynsligt samband við menn, og hava skiftandi partnarar.

Í Danmark eru skrásettir 129 tilburðir av apupokum síðan 23. mai hjá monnum, sum hava havt kynsligt samband við menn.

Heilsustýrið hevur tí gjørt av, at víðka málbólkin fyri at forða fyri útbreiðsluni.

Koppseting móti apupokum verður framd tvær ferðir við minst 28 døgum ímillum.

Danska heilsustýrið arbeiðir í løtuni við, hvussu koppsetingin skal leggjast til rættis. Væntandi verður farið í gongd hesa vikuna.

Danski Aids-grunnurin er í tøttum samskifti við heilsustýrið um, hvussu grunnurin kann vera við til at leggja koppsetingarætlanina til rættis.

- Vit kunnu gera okkara íkast við at lata upp okkara viðgerðarstovur, sum vit hava kring landið. Vit hava læknar og sjúkrarøktarfrøðingar, sum eru til reiðar at hjálpa og koppseta, sigur Lars Østergreen, stjóri í Aids-Fondet.

Stórur partur av víðkaða málbólkinum er kendur av heilsuskipanini frammanundan, tí hesir menn eru við í fyribyrgjandi viðgerðini móti hiv.

Apupokur smitta við tøttum kropsligum sambandi. Vandin fyri smittu er ikki knýttur at kyni ella kynslívi, men er tó nógv útbreiddur kring allan heim millum menn, ið hava kynsligt samband við menn, skrivar Ritzau.

Enn er onki frætt um, at apupokur eru staðfestar í Føroyum. Í gjár frættust tíðindi um, at tveir tilburðir av smittuni vórðu staðfestir millum starvsfólk hjá Thule Air Base í Norðurgrønlandi. 

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder