Danmark: Eitt prosent av fólkinum hevur fingið báðar koppsetingarnar

Í Danmark hevur beint omanfyri eitt prosent av fólkinum fingið báðar koppsetingarnar.

Heilt nágreiniliga hava 1,02 prosent – 61.019 persónar – nú fingið bæði fyrru og seinnu koppsetingina, vísir uppgerð hjá Statens Serum Institut.

124.550 persónar afturat hava fingið fyrru koppsetingina men mangla enn ta seinnu.

Danmark byrjaði at koppseta 27. desember, og higartil hevur Danmark brúkt koppingarevni hjá Pfizer og BioNTech umframt koppingarevni hjá Moderna. Koppingarevnið hjá AstraZeneca, sum í gjár varð góðkent av ES, kemur væntandi eisini til Danmarkar í aðru viku av februar.

Í Føroyum, har byrjað varð at koppseta 30. desember, hava nærum 4.000 persónar – 7,5 prosent av fólkinum – fingið fyrru koppsetingina, meðan bert ein persónur er liðugt koppsettur, vísa tølini hjá corona.fo, sum vórðu dagførd í gjár.