Danny Baldursson vann stóra sangskrivarakapping í Týsklandi

Í Føroyum kenna vit hann sum forsangaran í Danny & the Veetos, og seinastu tíðina hevur hann eisini framført landaplágur saman við Inga Poulsen. Men nú hevur hann gjørt um seg í Týsklandi.

Danny Baldursson vann í gjárkvøldið German Songwriting Awards við sanginum “Holy”.

Við hjálp frá Hans Marius Ziska og Esben Svane er sangurin gjørdur, og við fyrsta plássinum í gjár hevur Danny vunnið sær pláss til MUSEXPO í Los Angeles, sum kann føra við sær sáttmálar og samband við stór útgávufeløg.

Hetta verður í mars næsta ár.

Sangurin Holy varð skrivaður í Berlin í juni, og varð framførdur til kappingina í týska høvuðsstaðnum í gjárkvøldið.