Danska flogvápnið ávarar um flogvenjingar

Í sambandi við at eitt hernaðarligt bretskt flutnings- og eftirlitsflogfar herfyri gjørdi nakrar flúgvingar yvir Føroyar í óvanliga lágari hædd, hevur verið sagt, at orsøkin til at íbúgvarnir, sum vórðu órógvaðir av hesi flúgving, ikki vórðu ávaraðir frammanundan, tí at so verður ikki gjørt í sambandi við kreppustøður – heldur ikki tá talan er um venjing.

Men í dag hevur danska flogvápnið sent út eina almenna frágreiðing, sum ávarar um hernaðarlogar flogvenjingar í næstum við teirra F-16 jaðaraflogførum.

Frágreiðingin er send út í sambandi, at tað í næstum verður vant við hesum flogførum í myrkri, og tí kunnu fólk verða órógvað av tí nógva larminum, sum hesi flogfør geva frá sær í tíðum á samdørginum, sum ikki eru vanligar.

Flogvápnið skrivar soleiðis í fráboðanini á Facebook-vanga sínum.

- Um tit uppliva støðuga rumlan yvir longri tíð á himmalinum, er talan um venjing í “Close Air Support”, har flogskipararnir venja í at hjálpa egnum herdeildum við at bumba fíggindan við neyvum vápnum.

Flogvenjingarnar verða gjørdar í samstarvi við herfólk á landi. Fyri tað mesta enda slíkar venjingar klokkan 20, men í komandi viku verða venjingarnar til kl. 23.45, skrivar flogvápnið, sum tó ikki sigur hvar í landinum, venjingarnar verða.

Uttan at vita tað við vissu (fyrispurningur er sendur) kunnu vit siga, at hesar venjingar neyvan verða gjørdar í Føroyum.