Drýlataco við hummara var ársins rættur

Matstovan Ræst í Havn fekk ikki færri enn tvær heiðurslønir, tá felagsskapurin Danske Madanmeldere sunnudagin kjósaði ársins rættir í 2025.

Kokkurin á Ræst, Sebastian Jimenez vann bólkin, ársins rættur við fiski fyri rættin, kallaður ‘føroysk taco við jomfrúhummara’.

Talan er um ein av smáu rættunum, sum Sebastian hevur borðreitt við á Ræst hesi seinastu árini. Av fleiri ummælarum kosin sum hæddarpunktið í spennandi matupplivingini á hesi heilt serligu matstovuni.

Talan er um taco bakað úr drýladeiggi við einum hummarahala og so eini speisi meksikanskari sós – pipaan roco – sum kokkurin gar í einum mortara við borðið hjá gestunum, Ein partur av innihaldinum í sósini er heilin á hummaranum.

Rætturin er nú kosin ársins rættur í danska ríkinum í 2025.

Sebastian Jimenes var eisini tilnevndur í bólkinum, kallaður ‘land’. Tað var við einum rætti úr lambshjarta. Her var tað kokkurin á matstovuni Kadeau, sum vann við einum rætti við dádýri og soppum.

Men Ræst fekk eina heiðursløn afturat frá Danske Madanmeldera.

Tað var fyri skeinking – ‘udskænkning’. Heiðurin fór til matstovuleiðaran og vínserfrøðingin, Karin Visth. 

(Mynd: Ræst)