Durita Tausen heldur fram sum forkvinna í Krabbameinsfelagnum

Á aðalfundinum hjá Krabbameinsfelagnum stóðu tveir nevndarlimir fyri valið. Durita Tausen, forkvinna, tók við afturvali, og hon heldur fram í sessinum. Sonja Nielsen valdi ikki at stilla upp aftur.

Nýggj í nevndini er Anna Kristina Joensen, sum avloysir Sonju

Nevndin hevur skipa seg á hendan hátt:

Durita Tausen, forkvinna
Magnus Magnussen, næstformaður og kassameistari
Jóhan Poulsen, nevndarlimur
Olga Kristina Hansen, nevndarlimur
Anna Kristina Joensen, nevndarlimur

Tiltakslimir eru Martin Joensen og Elmar Ósá.

14 færri tilburðir

Í ársfrágreiðingini, sum varð løgd fram á ársfundinum, varð millum annað víst á, at 356 tilburðir av krabbameini vórðu staðfestir í Føroyum í 2020. Hetta eru væl fleiri enn í so at siga øllum teimum seinastu tíggju árunum, men 14 færri enn í 2019 tá talið var methøgt.

Talan er tó ikki um eina endurspegling av gongdini í fleiri av londum rundanum um okkum, har koronufarsóttin ávirkaði, hvussu nógvir krabbameinstilburðir hava verið staðfestir - í eitt nú Stóra Bretlandi, USA, Hollandi, Svøríki,
Norðurírlandi og Danmark er krabbamein í nógvum førum eisini staðfest seinni í sjúkugongdini orsakað av koronustøðuni, og hetta hevur sjálvandi gjørt støðuna verri - talan er um "undirdiagnostisering"
 
Tíbetur síggja vit ikki hesa gongdina í Føroyum. Hetta vísir Marnar Fríðheim Kristiansen, ph.d. lesandi, á í grein, sum hann hevur skrivað fyri Krabbameinsfelagið.

- Títtleikin av krabbameini er tann sami ella eitt sindur hægri í mánaðunum, meðan korona hevur herjað, borið saman við sama tíðarskeið tey seinastu fýra árini. Í mars og apríl mánaði vóru tølini nakað hægri enn undanfarin ár. Tað síggjast smá sveiggj, men hetta er væntandi við so smáum tølum.

Sí ársfrágreiðing her