Earth Hour, ella tími jarðarinnar, í ár var leygarkvøldið 26. mars frá klokkan 20.30 til 21.30.
Endamálið við hesum afturvendandi átaki, sum verður hildið um størsta partin av heiminum, er at varpa ljós á umhvørvið – ein áminning á fólk um at geva náttúruni gætur, og m.a. at minka um elnýtsluna fyri at verja umhvørvið.
Í Føroyum varð skipað fyri tiltøkum kring landið, og sløkkja kommunurnar m.a. gøtuljósini hendan tíman.
Á SEV fylgja tey við, um og hvussu elnýtslan minkar hesa løtuna, og í ár minkaði elnýtslan við 2,86 MW.
Tað var meira enn í 2019, men tó nakað minni enn í fjør og væl minni enn í 2020. Fyri tveimum árum síðani minkaði lastin hjá SEV hesa løtuna við 4,78 MW, sum svarar til ársnýtsluna hjá einum miðal húsarhaldi.
Elframleiðslan í tíma jarðarinnar kom niður á 40,55 MW, og av teimum vóru 84 prosent burðardygg orka, harav ávikavist 47 prosent vatnorka og 35 prosent vindorka, sløk tvey prosent biogass, meðan oljan stóð fyri 16 prosentum, skrivar SEV.
Soleiðis sá elframleiðslan út frá klokkan 20.30 til 21.30 leygarkvøldið (Mynd: SEV)
Vinarliga broyt tínar kennifíla - og privatlívsstillingar fyri at síggja hetta innihald