Earth Hour í Fuglafjarðar kirkju

Fyri áttandu ferð luttekur Fuglafjarðar kommuna í Earth Hour í kvøld frá kl. 20.30 til 21.30. Tá verða øll gøtuljós í kommununi sløkt.

Eitt Earth Hour tiltak verður í Fuglafjarðar kirkju í kvøld kl. 20.30, har Fuglafjarðar sangkór syngur, meðan kertuljós lýsa kirkjuna upp. Hendan løtan varar í áleið ein hálvan tíma.

Kommunan heitir á stovnar, fyritøkur, handlar, feløg og einstaklingar um at sløkkja ljós inni og úti í tann mun tað ber til. Kommunan minnir fólk á at ansa sær og at brúka endurskin, um tey ganga ella koyra hendan tíman, tí úti er bølamyrkt, skrivar kommunan í tíðindaskrivi.

Earth Hour er eitt átak móti ovurnýtslu í okkara tíð, við fokus á hart trýsta náttúru-margfeldni, umhvørvis-trupulleikarnar og veðurlagsbroytingarnar, sum eru íkomin av ovurnýtslu. Tí verða øll óneyðug ljós sløkt stórt sæð um allan heim, allastaðnis í tímanum millum kl. 20.30 og 21.30, eisini í Fuglafirði, á Kambsdali og á Hellunum.