Eldur kom í el-skutara

Tíðliga í gjárkvøldið varð boðað frá nógvum royki í eysturbýnum í høvuðsstaðnum. Hetta var uttanfyri bygningin hjá Posta á Óðinshædd.

Løgregla og sløkkiliðið komu á staðið og sløktu eldin, ið sá út til at koma frá nøkrum dekkum, ið stóðu á økinum hjá Posta.

Vakthavandi á løgreglustøðuni í Tòrshavn váttar fyrrapartin, at eldurin í roynd og veru kom frá einum el-skutara. Hann breiddi seg til ein annan og síðani til tey mongu dekkini, ið stóðu nærhendis.

Vaktleiðarin sigur, at skutarin tíbetur stóð úti, tí annars kundi tað verði ein stórur skaði. 

Eitt stórt arbeiði skuldi til fyri at fáa veruligt tamarhald á støðuni, tí sløkkiliðið noyddist at spræna vatn á motorin alla nátt fyri. Talan var um eitt battarí á stødd við eina mateskju, sigur vaktleiðarin, so ein kundi bert ímynda sær, um slíkur eldur kom í ein bil.

Løgreglan ger nú nærri kanningar fyri at finna orsøkina til, hví eldur kom í. Til ber ikki at siga meira um hetta enn.