Eldurin við Ljósá ikki ásettur

Einki bendir á, at eldurin í vinnubygningi við Ljósá tann 9. august varð ásettur, sigur Heri Andreassen, leiðari á kriminaldeildini hjá løgregluni, við Kringvarp Føroya í dag.

Serfrøðingar frá brunateknisku deild hjá politinum í Danmark hava verið í Føroyum og kannað stóra eldin, sum varð fráboðaður um hálvgun seks tíðina hendan dagin.

Ikki fyrr enn um hálvgun ellivu tíðina var tamarhald á støðuni.

Staðfest er, hvar eldurin kyknaði, men eldurin hevur verið so ógvusligur, at øll spor, sum kunnu benda á orsøk til eldin, eru oyðiløgd, upplýsir løgreglan fyri kvf.fo.

Bygningurin fór illa, og umleið helvtin av honum er brendur. Klædningurin á grannahúsunum fekk skaða eins og ein bilur sum stóð nærhendis eisini fekk skaða av nógva hitanum.

Sí myndarøð: Myndir: Bygningurin við Ljósá illa farin

Ein persónur var inni í bygninginum, tá eldurin kyknaði, men slapp út í øllum góðum.