Ingi Samuelsen
Sangurin “Choosin’ Texas” við amerikansku countrysangarinnuni, Ella Langley, liggur nú ovast á Billboard Hot 100 á 19. viku út í eitt. Harvið hevur hon nátt metinum fyri longst tíð á evsta plássi á hittlistanum, tá jólasangir ikki eru tiknir við, skrivar Billboard.
Sangurin hevur nú metið saman við sanginum “A Bar Song (Tipsy)” hjá Shaboozey og “Old Town Road” við Lil Nas X og Billy Ray Cyrus frá 2019, sum eisini lógu á fyrsta plássi í 19 vikur.
Tann einasti sangurin, sum hevur ligið longur á fyrsta plássi er “All I want for Christmas is You” við Mariah Carey. Jólahittið frá 1994 hevur ligið á fyrsta plássi í 22 vikur tilsamans, tó bara í sambandi við jólahátíðina frá 2019 og 2026.
„Choosin’ Texas” tók fyrstaplássið fyrstu ferð í februar í ár, og hevur sambært Billboard sett fleiri met síðani. Í undanfarnu viku hevði sangurin 24,3 millliónir almennar streymingar og náddi út til 55,7 milliónir útvarpslurtarar í USA.
Countrytónleikur ger um seg á Billboard Hot 100 í hesum tíðum. Fýra teir ovastu sangirnir eru við countrysangarum. Beint eftir Langley liggur “Boston” hjá Stella Lefty, meðan Taylor Swift er nr. 3 við “I knew it, knew You, meðan “Been by Now” við Morgan Wallen liggur á fjórða plássi.
Vinarliga broyt tínar kennifíla - og privatlívsstillingar fyri at síggja hetta innihald