Elon Musk ætlar at gevast sum Twitter-stjóri

Ríkmaðurin Elon Musk ætlar at gevast sum stjóri á sosiala miðlinum Twitter, tá hann hevur funnið onkran at yvirtaka starvið.

Herfyri koyrdi hann eina atkvøðugreiðslu út á sín Twitter-vanga, har fólk kundu atkvøða um, hvørt hann skuldi leggja frá sær sum stjóri ella ikki. Yvir 17 milliónir brúkarar atkvøddu, og 57,5 prosent av teimum atkvøddu fyri, at hann skuldi gevast sum stjóri.

Í nátt okkara tíð boðaði Musk so frá í dagføring á Twitter, at hann ætlaði at leggja frá sær.

– Eg fari frá sum stjóri, so skjótt eg finni ein, sum er nóg tápuligur at yvirtaka starvið, skrivar hann sambært Ritzau.

Musk, ið eisini eigur m.a. Tesla, ásannar, at hann hevur ov nógv at taka sær av, men at tað er ikki lætt at finna ein nýggjan stjóra til Twitter.

– Eingin, sum klárar at halda lív í fyritøkuni, vil hava starvið, sigur hann.