Enn ein republikanari tekur seg úr forsetastríðnum

Guvernørurin í North Dakota, Doug Burgum, tekur seg nú aftur í kappingini um at gerast forsetavalevni fyri Republikanararnar um eitt ár.

Hetta boðaði kampanjuskrivstovan hjá honum frá í dag. Doug Burgum er sostatt hin sjeyndi republikanarin, sum tekur seg úr stríðnum.

Valstríðið hjá honum kom sostatt ongantíð rættiliga í gongd. Burgum slapp ikki, tá nakrir av republikansku forsetavalevnunum vóru við á einum sjónvarpaðum valfundi í Miami fyrst í november.

Um orsøkina at taka seg aftur verður sagt, at hann ikki megnaði málsetningin um minst 4 prosent í undirtøku í tveimum landsumfatandi veljarakanningum.

Seks fólk – fimm mans og ein kvinna – eru nú eftir í kappingini at gerast forsetavalevni, nú fáar mánaðir áðrenn undanvalini byrja.

Tey eru Chris Christia, Ron DeSantis, Nikki Haley, Asa Hutchinson, Vivek Ramaswamy og Donald Trump.

Fyrsta undanvalið verður í statinum Iowa 15. januar.