ES-frágreiðing: Ov fáir dómarar í Danmark

Sambært frágreiðing frá ES-nevndini, sum hevur hugt nærri at rættarskipanunum í ES-limalondunum, er Danmark ovast, tá tað kemur til óheftni hjá dómstólunum. Men tað lága talið á dómarum er ein avbjóðing.

Mikael Sjöberg, formaður í danska dómarafelagnum sigur, sambært Ritzau, at talan er um ein álvarsaman trupulleika.

Í løtuni sæst, at málsviðgerðartíðin fyri bæði sivilmál og revsimál gerst longri, og tað er av tí einfaldu orsøk, at har ikki eru nóg nógv fólk til at loysa uppgávurnar, sigur hann.

– Eg haldi veruliga, at ES-nevndin vísir á ein álvarsaman trupulleika.

Danmark hevur, sambært frágreiðingini hjá ES-nevndini, lægsta talið á dómarum fyri hvørjar 100.000 íbúgvar – 6,6 – og brúkar Danmark, sum hevur uml. 375 dómarar, 0,17 prosent av bruttotjóðarúrtøkuni uppá rættarskipanina.