ES-tingið samtykt forboð av einnýtisplasti

Seinnapartin í dag samtykti ES-tingið at banna m.a. tallerkar, bestikk, og súgvirør úr einnýtisplasti.

Endamálið er at minka um dálkingina av plasti í heimshøvunum. Avtalan kom longu í lag millum limalond, ES-komissjónina og tingið í fjør, men nú varð uppskotið endaliga góðkent.

Væntandi kemur nýggja plastforboðið í gildi í 2021, skrivar DR.

Við nýggja forboðnum hevur mann eisini sett eitt mál um, at 90 prosent av øllum plastfløskum verða innsavnaðar áðrenn 2029.