Eysturkommuna: Tvær verkætlanir av álvara farnar í gongd

Í gjár, mikudagin 19. juni, hevði Per Martin Gregersen úr at gera við at loysa fløg. Fyrst var tað í Gøtudali.

- Í morgun varð fyrsta flagið loyst í samband við út- og umbyggingina av Læknamiðstøðini í Gøtudali. Tað var borgarstjórin Per Martin Gregersen, sum loysti flagið. Articon stendur fyri arbeiðnum, sum Teknistovan í Gøtu hevur teknað.

Eftir ætlan verður arbeiðið liðugt við ársenda í ár. Harvið verður aftur møguligt hjá øllum borgarunum í Eysturkommunu at greiða síni læknaviðurskifti í viðtaluni í Gøtudali, skrivar heimasíðan hjá kommununi.

Meira kann lesast um verkætlanina her

Hakin varð eisini settur í til verkætlanina Eyðabø. Her var tað Dávid Jacobsen, nevndarformaður í P/F Varðin, sum loysti flagið saman við Per Martini Gregersen.

Verkætlanin P/F Eyðabø fevnir um 34 íbúðir, sum koma at liggja upp at eldrasambýlinum Gøtubrá. Byggifyritøkan P/F Búsetur er arbeiðstakari til verkætlanina, sum P/F Varðin stendur fyri, og  Sp/f Henning Larsen arkitektar hava teknað.

Arbeiðið við íbúðunum fer eftir ætlan at vera liðugt í 2026.