Eysturríki droppar umstrítt koppsetingarkrav

Í dag hevur Eysturríki strikað umstríddu lógina um koppsetingarkrav fyri vaksin sum hevur elvt til fleiri mótmæli í landinum.

Hesa avgerðina hava myndugleikarnir tikið eftir áheitan frá serfrøðingum.

Tað er uml. ein mánaður síðani, lógin kom í gildi, og miðskeiðis í hesum mánaðinum var ætlanin, at myndugleikarnir skuldu fara í holt við at revsa fólk, sum ikki høvdu latið seg koppseta fyri koronu.

Revsingin skuldi vera ein bót á upp til 3.600 evrur fyri ársfjórðingin (góðar 27.000 krónur), men nú verður hetta av ongum.

Koppsetingarkravið verður endurskoðað um tríggjar mánaðir, sigur eysturríkski heilsumálaráðharrin sambært Ritzau.