Faroe Islands International Minority Film Festival avdúkar nøvn

Fimta útgávan av Faroe Islands International Minority Film Festival verður í ár 23.-27. juli í Tórshavn. Filmfestivalurin er fyri øll, minnilutar sum meirlutar, ið ynskja meiri vitan um minnilutar innan kyn, seksualitet, etnisitet, trúarlív og mentan.

Á FIMFF vera sýningar, framløgur og ymisk spennandi tiltøk, eins og undanfarnu árini, í Reinsaríinum, Perluni og í Norðurlandahúsinum. Sum nakað nýtt verða eisini filmsýningar í Havnar Bio.

Camilla Tved

Hvat er ein familja?
Høvuðstemað í ár snýr seg um familju, og hvussu ymiskar familjur kunnu vera. Evnið verður viðgjørt við eina viftu av ymsum filmum og list, ið varpa ljós á minnilutar. Við hesum setur festivalurin spurnartekn til ta siðbundnu heteronormativa fatanina av, hvat ger eina familju, og gevur eitt fríkst íkast til føroyska kjakið um familjuuppbygging.

Sum vanligt vera eisini fyrilestrar til ársins FIMFF. Millum annað ein online framløga við Camilla Tved, jarðarmóður, master í sexologi og politiskur ráðgevi. Ivaleyst kenna fleiri Camillu fyri hennara arbeiðið fyri javnstøðu og LGBT-rættindi í Danmark. Hon setur LGBTQ+-familjuna og -einstaklingin í miðdepil. Tann typiska heteronormativa kjarnufamiljan hevur framíhjárættindi í vestliga heiminum, men spurningurin, um hendan familjan er einasta rætta, hevur ofta verið stillaður tey mongu seinastu árini.

Eisini verður ein lítil tekniverkstova fyri børn í Norðurlandahúsinum 24.-27. juli har spurningurin “Hvat er ein familja?” virkar sum íblástur. Tekningarnar verða síðan hongdar upp í forhøllini og skapa soleiðis eina framsýning av familjuni 2021.

Mona Fastvold

Kend andlit á skíggjanum í Norðurlandahúsinum
Forskotið til festivalin verður 23. juli í Norðurlandahúsinum við setanarfilminum “The World to Come”, har filmsleikstjórin, norska Mona Fastvold, verður til staðar at svara spurningum.

Millum sjónleikararnar í filminum eru at finna Vanessa Kirby, ið spælir systur Elizabeth-drotning, Margaret, í Netflix-seriuni “The Crown”, og Casey Affleck. Filmurin er ein kærleikssøga um tvær kvinnur í Schoharie County, NY, ið finna hvørja aðra í einum isoleraðum landbúnaðarumhvørvið í 1850’unum.

COBRAH

Gender Bender
Leygardagin 24. juli verður ársins Gender Bender-veitsla; bombastiska punktummið fyri ein heilan dag, har dentur verður lagdur á kvir seksualitet, sum eisini er undirevnið á ársins festivali.

Fleiri listafólk luttaka á hesum kvøldinum, eitt nú svensk Grammi-nomineraða COBRAH. Hon er tónleikari og visuelt listafólk, og er ein partur av kvir- og fetish-pallinum í Stokkhólmi. Hennara show er sex- og kroppspositivt. Tónleikurin er harður og elektroniskur.

Forkunnugt samstarv
FIMFF leggur seg eftir at vera við í feskasta samfelagsliga kjakinum um minnilutar. Fyri at koma við nógvum øðrvísum sjónarmiðum og sjónarhornum til evnini, hevur festivalurin enn einaferð samstarvað við spennandi fólkum.

Harímillum hevur bretsk-indiska kvir-aktivisturin Lucy Jane Mukerjee virkað sum gestaprogrammleiðari og hjálpt FIMFF-kjarnuni at finna fram til teir bestu filmarnar. Sum stjórnprogrammørur hjá Tribeca Film Festival, og eitt av upphavsfólkunum til Programmers of Colour Collective (ein bólkur av BIPOC-fólkum, ið arbeiða fyri fjølbroyttari umdømi í filmskurartering) stillar hon inn á týdningin av m.a. LGBTQ+- og minnilutaumboðan.

Festivalurin verður gjørdur í samstarvi við Nordisk Kulturfond, Tórshavnar Kommunu, Norðurlandahúsið, Tórsgøtu, Mentamálaráðið, Filmshúsið og onnur. Stigtakarar eru Nadia Abraham, Dan Helgi í Gong, Siri Súsonnudóttir Hansen, Leo Lávík og Elisabeth S. Olsen.