Felag hjá Elon Musk stovnað smápartafelag í Føroyum

Internetveitarin Starlink er eftir øllum at døma á veg til Føroya.

Í gjár, 1. apríl, varð eitt føroyskt felag stovnað hjá Skráseting Føroya við navninum Sp/F Starlink Faroe Islands.

Starlink er felag hjá SpaceX, sum heimsins ríkasti maður, Elon Musk, eigur. Elon Musk eigur eisini Tesla og X, og er eisini serligur ráðgevi hjá Donaldi Trump.

Sambært ognaryvirlitinum hjá Skráseting Føroya er Elon Musk veruligur eigari.

Felagið er heimahoyrandi undir Bryggjubakka 21 í Havn, sum er skrivstovan hjá Anfinni V. Hansen, advokati, sum hevur skrásett fráboðanina.

Sambært Frihedsbrevet hevur Starlink longu fleiri kundar í Føroyum. Vikmar hevur í hálvtannað ár selt tøknina, sum ger, at ferðafólk og manning á Smyrli hava samband við alnetið. Tað hava vaktarskipini Tjaldrið og Brimil eisini, umframt ein røð av føroyskum fiskiskipum.

Endamálið hjá felagnum er sambært skrásetingini at veita samskiftistænastur og aðrar tænastur, reka, og eiga fastognir umframt annað vinnuligt virksemi í hesum sambandi.

Starlink er skipan við túsundtals smærri fylgisveinum, sum ferðast kring jørðina beint uppiyvir atmosferuni, sum senda signal til móttakaran. Soleiðis sleppur Starlink undan at leggja káplar.

Hollenska móðurfelagið Starlink Holdings Netherlands B.V er stovnari av føroyska smápartafelagnum.