Ferðafólk á hotelli Tenerife sett í karantenu

Umleið 1.000 gestir á hotellinum H10 Costa Adeje Palace á sponsku frítíðaroynni Tenerife eru sett í karanteni eftir at tað er staðfest, at ein av gestunum, ein italskur lækni, er smittaður við coronavirus.

Tað skriva fleiri spanskir miðlar í dag.

Og sambært Danmarks Radio, so hevur ferðafólkafyriskiparin Bravo Tours tveir danskar ríkisborgarar á hotellinum. Ferðafyriskiparin TUI upplýsir, at fleiri sviar og finnar eru millum avbyrgdu gestirnar á hotellinum. Upprunaliga skuldu fleiri danskir ríkisborgarar skrivast inn á hotellið, men tey vórðu umbókað á annað hotell.

Italski ferðamaðurin, ið er smittaður við corona, búði á hotellinum í seks dagar. Hann hevði fepur í fleiri dagar áðrenn hann um vikuskiftið vendi sær til eina privata læknaviðtalu, har tað varð staðfest, at maðurin varð smittaður við coronavirus.

Maðurin, sum kemur frá Lombardia landslutinum, er innlagdur á universitetssjúkrahúsinum Nuestra Senora de Candelaria, skriva spanskir miðlar.