Fimm staðfestir positivir í gjár

Í gjár vórðu fimm persónar staðfestir positivir fyri covid-19 í Føroyum, vísa nýggjastu tølini hjá Landslæknanum.

Ein teirra, ið varð staðfestur positivur í gjár, er komin til Føroya úr útlondum, og fekk staðfest smittuna við kanning á flogvøllinum.

Ein annar persónur fekk staðfest smittuna við einari kanning seks dagar eftir, at viðkomandi var komin til Føroya úr útlondum. Triði smittutilburður hevur samband við persónin, ið varð staðfestur positivur á sætta dags kanningini.

Viðvíkjandi teimum báðum seinastu persónunum er í løtuni óvist, hvussu teir hava fingið smittuna.

Allir fimm persónarnir eru avbyrgdir, og Landslæknin er í gongd við smittusporingina, skrivar corona.fo.

Sostatt hava nú 539 persónar fingið staðfest covid-19 í Føroyum, og av teimum eru 516 persónar staðfestir frískir aftur. Sostatt eru 23 persónar positivir í løtuni.

Eingin er í løtuni innlagdur á Sjúkrahúsverki Føroya í sambandi við covid-19.