Filmsfelagið sýnir Oscarvirðisløntan film um at missa hoyrnina

Mikudagsfilmurin í Filmsfelagnum 16. juni er um ein heavy rock trummusláara, sum missur hoyrnina. Trygvi á Reynatrøð, ið er deyvur og arbeiðir í Námi, fer at innleiða sýningina. Í innganginum fer Trygvi at vísa til eina nýggja kanning um livikorð hjá deyvum í Føroyum.

Tvífalti Oscarvirðislønti filmurin, ”Sound of Metal”, er um trummusláaran Ruben, sum spælir í einum heavy rock orkestri. Ruben stríðst við at loysa seg frá rúsevnum og leggur nógv fyri, at gera sítt besta á pallinum og verða viðurkendur sum tónleikari. Men so hendir tað, sum aldri burdi hent fyri ein tónleikara: hann missir hoyrnina.

Nú eru góð ráð dýr. Fyrst roynir Ruben at lata sum einki, men tá tað snøgt sagt ikki ber til, noyðist hann at sanna, at ein tung ferð stendur fyri framman, sum er inn í ein ókendan heim, sum er uttan ljóð.

”Sound of Metal” er ein dramatiskur filmur um ótamdan kærleika til tónleikin, men fyrst og fremst er hann um innaru ferðina hjá unga manninum, sum missir samleikan, tá hoyrnin hvørvir.

Bretski rapparin, Riz Ahmed, sum er kendur úr filminum ”Rogue One: A Star Wars Story”, er í eirindaleysa høvuðsleiklutinum, og hevur Olivia Cooke úr ”Ready Player One” afturat sær.

Mikkel E.G. Nielsen, ið hevur klipt filmin, fekk Oscarvirðislønina fyri avrikið í ár. ”Sound of Metal” fekk eisini Oscarvirðislønina fyri besta ljóð, ið veruliga er innovativt, ljóðið.

Filmsfelagið, sum fyri stuttum vísti týska klassikaran “Blikktrumman”, hevur eisini víst amerikanska filmin ”Whiplash”, ið aftur hevði ein trummusláara í høvuðsleiklutinum.

Sýningarnar í Filmsfelagnum eru almennar.