Filmsfelagið vísir film um arvarætt í Jordan

Mikudagin 29. mai vísir Filmsfelagið ein nýggjan virðisløntan film úr Jordan, sum viðger arvarætt, tá einkjan situr eftir við eini dóttir.

Jordanski filmurin, "Inshallah ein drongur", ið vann tvær virðislønir í Cannes og varð almenna Oscaruppskotið, sigur søguna um eina braneggjaða kvinnu, sum av øllum alvi stríðist fyri dóttrini og sær sjálvari í einum samfelag, ið er skapt av monnum og bara er fyri menn.

Umframt at dragast við sorgina, tá maðurin bráddliga doyr, noyðist einkjan, Nawal (Mouna Hawa), at stríðast móti jordanskum arvarætti. Hon skal rinda skuldina hjá manninum, og kann missa bæði hús, hon sjálv hevur goldið, og allan arvin. Tí uttan ein son, og arving av kallkyni, fella húsini til svágin, ið samstundis fær rættin yvir dóttrini, Noru.

Ørkymlað og í villareiði finnur Nawal uppá at siga í rættinum, at hon er uppá vegin. Vónin um, at tað er ein drongur, skal vinna henni tíð at berjast móti patriarkalska rættarsamfelagnum í Jordan. Eitt tilætlað væl, sum kastar hana út í ein óforútsigiligan dyst móti løgskipanini, nú hon sjálv hevur tikið lagnuna í egnar hendur.

Tí er heitið á filminum "Inshallah ein drongur", um Gud vil, ein drongur.