Finnland er 31. Nato-limalandið

Í dag gjørdist Finnland formliga limur í verjusamgonguni Nato.

Seinnapartin handaði Pekka Haavisto, finski uttanríkismálaráðharrin amerikanska uttanríkismálaráðharranum Antony Blinken almennu innlimingarskjølini í høvuðssætinum hjá Nato í Brússel.

Sostatt hevur Nato, sum eisini kann hátíðarhalda 74. stovningardagin í dag, nú 31 limalond.

Ongantíð áður hevur tað gingið so skjótt at innlima eitt land í Nato. Finnland søkti saman við Svøríki um Nato-limaskap á vári í fjør.

Svøríki noyðist tó at bíða eina løtu afturat, men Nato-aðalskrivarin, Jens Stoltenberg, er sannførdur um, at Svøríki verður innlimað í sambandi við Nato-toppfundin í Vilnius í juli, skrivar Ritzau.