Fleiri avlýsingar hjá SAS í morgin

SAS boðar nú frá, at fleiri flogferðir verða avlýstar í morgin, leygardagin, orsakað av verkfallinum hjá flogskiparunum.

Í dag eru 72.000 ferðafólk rakt av verkfallinum, og væntandi fer tað at raka 34.000 ferðafólk afturat í morgin.

Hetta rakar eisini tey ferðafólkini, sum skuldu við SAS úr Keypmannahavn til Vágar seinnapartin í morgin.

- Tað snýr seg um okkara arbeiðsviðurskiftir. Vit hava biðið um at fáa somu viðurskifti, sum flogskiparar í øðrum lágprísfeløgum hava, har møguleiki er at vita frammanundan, hvussu arbeiðast skal, og at vit fáa fýra dagar frí um vit hava verið til arbeiðis og burtur heimanífrá í fimm dagar, segði Henrik Thyregod, næstformaður hjá donsku flogskiparunum, við DR í morgun.

Mariam Skovfoged, samskiftisleiðari hjá SAS hevur sagt, at hesi krøvini eru "órímilig".

Higartil eru uml. 700 flogferðir avlýstar orsakað av verkfallinum. Enn er ógreitt, hvussu verður sunnudagin.