Fleiri ES-tiltøk móti Russlandi skulu samtykjast í dag

Í dag hittast fíggjármálaráðharrarnir í ES-londunum í Brússel fyri at tingast um nýggj tiltøk móti Russlandi.

Sambært Ritzau tíðindastovuni eru donsku boðini greið undan fundinum.

- Eg fari á fundinum at gera greitt, at danska stjørnin ynskir at seta í verk harðast møgulig tiltøk móti Russlandi, sigur Nicolai Wammen, fíggjarmálaráðharri undan fundinum.

ES-londini samdust í gjár um ein nýggjan pakka av tiltøkum móti Russlandi sum revsing fyri innrásini í Ukraina. Tað boðaði ES-formansskapurin frá á Twitter.

Talan er um fjórða pakkan av tiltøkum, sum nú skal samtykkjast. Við í hesum pakkanum er eitt krav um at Russland missir sín limaskap í heimshandilsfelagsskapinum, skrivar dr.dk.