Fleiri ferðsluóhapp seinasta samdøgrið

Seinnapartin í gjár var eitt ferðsluóhapp í Havn, har ein bilur fór ígjøgnum eina girðing og endaði í eini á. Boð máttu sendast eftir kranabili fyri at fáa bilin uppaftur.

Førarin fekk ongan skaða, men illgruni er um, at hann var ávirkaður, og tí varð hann koyrdur á sjúkrahúsið, so blóðroynd kundi takast, sigur vaktleiðarin á løgreglustøðini í Havn.

Seinasta samdøgrið vórðu eisini fleiri onnur ferðsluóhapp skrásett, men eingin fólkaskaði stóðst av hesum.

Í Klaksvík koyrdi ein bilur útav vegnum, og í Havn koyrdi ein bilur út fyri annan bil, og førarin verður helst skuldsettur fyri ikki at yvirhalda víkiskylduna. Eisini var eitt ferðsluóhapp á Skálafjørðinum, har ein bilur tók í bilverjuna. Bilurin fekk nakað av skaða, og nummarpláturnar vórðu tiknar.

Løgreglan var eisini úti og kannaði ferðsluna bæði í gjár og í nátt. Kannað varð, um bilførarar koyrdu ávirkaðir, og vaktleiðarin upplýsir, at hóast nógvir bilar vórðu steðgaðir, so varð einki mál skrivað, so tað er at fegnast um.