Fleiri handtikin í Grønlandi

Leygardagin í farnu viku vórðu partar av einum líki funnir á einari brennistøð í vesturgrønlendska býnum Ilulissat, og í gjár vórðu fleiri fólk handtikin í málinum, upplýsir grønlendska løgreglan sambært Ritzau.

Handtøkurnar vóru framdar á einari addressu í býnum, men upplýst verður ikki, hvussu nógvir persónar talan er um.

Grønlendska løgreglan hevur tvær ferðir seinastu vikuna funnið partar av einum menniskjalíki á brennistøðini. Síðan leygardagin, er økið rannsakað við hjálp frá sløkkiliðnum, og seint mánadagin varð enn ein líkpartur funnið.

Um vikuskiftið verður hildið fram at rannsaka brennistøðini fyri fleiri slóðir. Harumframt verða tekniskar kanningar gjørdar á addressuni, har handtøkurnar vórðu framdar.

Í vikuni vóru boð send eftir rættarlæknum og teknikarum úr Danmark at hjálpa við kanningararbeiðnum. Meðan málið verður kannað, vil løgreglan ikki siga meira um málið.