Flogvanlukka í Philadelphia: Sjey fólk deyð

Sjey fólk lótu lív í flogvanlukkuni í amerikanska býnum Philadelphia leygarnáttina, og 19 fólk vórðu særd.

Tað var eitt sjúkraflutningsflogfar við seks fólkum umborð, sum datt niður. Umborð á flogfarinum var eitt barn og mamma hennara, umframt manningin, sum taldi fýra fólk. Øll seks vóru úr Meksiko. Barnið hevði fingið viðgerð fyri lívshættisliga sjúku í Philadelphia og skuldi flytast heimaftur til Meksiko.

Øll fólkini í flogfarinum lótu lív, umframt eitt fólk, sum sat í einum bili í økinum, har flogfarið datt niður, upplýsa amerikansku myndugleikarnir.

Í minsta lagi 19 onnur fólk á landi vórðu særd og flutt á sjúkrahús, men tey flestu eru útskrivað aftur.

Tilbúgvingarleiðarin í býnum, Adam Thiel, sigur, sambært BBC, at tað helst verður fleiri dagar, áðrenn myndugleikarnir hava eitt endaligt tal á deyðum og særdum.