Flokkarnir fundast, men lítið er at frætta

Í gjár var løgtingsval. Samgongan, ið hevur sitið seinasta valskeiðið, er slitnað, og hon hevur mist meirilutan. Hon kann sostatt ikki halda fram sum meirilutasamgonga, uttan at onkur flokkur legst afturat.

Sostatt er væntandi, at onkur broyting verður gjørd viðvíkjandi samanseting av samgongu og landsstýri.

Bárður á Steig Nielsen er enn løgmaður. Hann verður sitandi, til hann annaðhvørt sjálvur fer frá, ella møguliga verður koyrdur frá. Og hann hevur eisini sagt við Kringvarpið, at hann virðir fólkaræðið, og at tíðin nærkast, til hann letur samráðingarrættin frá sær.

Sum skilst hava flokkarnir fundast hvør í sínum lagi. Seinrapartin var ljós í fleiri flokshølum á Gamla apoteki í Havn, har flokkarnir halda til. Ljós var eisini í privatu hølunum hjá Javnaðarflokkinum tætt við.

Tað hevur ikki borið til hjá okkum at fáa nakað ítøkiligt at vita um samskifti ella samráðingar millum flokkarnar. Men tað er sannlíkt, at flokkarnir hvør í sínum lagi gera upp, hvat teir ynskja viðvíkjandi møguligum samgongusamstarvi við aðrar flokkar.

Hóast, at lítið og einki ítøkiligt er at frætta, so fer ivaleyst nógv samskifti fram millum partarnar.