Flóttafólk í túsundatal eru á veg til Evropa

Erdogan sigur at talið kann væntast at koma uppá 25.000 til 30.000 komandi dagarnar.

Grikkaland sigur at landið, hevur steðga fleiri túsund flóttafólkum í, at ferðast ólógliga inn í landið frá Turkalandi. Í Grikkalandið hava mynduleikarnir í morgun nýtt táragass í royndini at steðga flóttafólkum frá at koma inní landið.

Avgerðin hjá Turkalandi um at loyva flóttafólkum at ferðast um markið, kemur eftir at 33 turkiskir hermenn lótu lív í einum ógvusligum álopi í Idlib í Sýria. Sýriska stjórnin hevur við stuðli frá Russlandi roynt at taka Idlib aftur frá uppreistrarbólkum, ið eru stuðlaðir av Turkalandi.

Tað eru 3,7 milliónir sýrisk flóttafólk í Turkalandi, umframt flóttafólk úr øðrum londum, eitt nú Afganistan. Turkaland hevur áður forða flóttafólkunum í at ferðast til Evropa, eftir at Turkaland og ES gjørdu eina avtalu um hetta í 2016.

Erdogan skuldsetur ES fyri ikki at halda avtaluna, og sigur at tað er orsøkin til at Trukaland loyvir flóttafólkunum  at ferðast til Evropa.