Fóðurflakin á Víkum komin í tingið

Hvørjar verða umhvørvissligu avleiðingarnar av, at Hellutangi í longri tíð liggur vesturi á Víkum, og hvussu verður syrgt fyri, at tær verða avmarkaðar.

Tað er ein av spurningunum, sum Ingilín D. Strøm, tingkvinna fyri Javnaðarflokkin, hevur sett Helga Abrahamsen, landsstýrismanni í umhvørvis- og vinnumálum, í einum grein 52 fyrispurningi.

Fóðurflakin hjá alifelagnum Hiddenfjord sleit í illveðri 5. apríl og rak á land, har hann hevur ligið síðani. Fleiri royndir hava verið gjørdar, men allar eru miseydnaðar. Ætlanin er nú at Hellutangi verður liggjandi fyri veturin.

- Áðrenn aliloyvið varð givið við umhvørvisgóðkenning vesturi á Víkum, heittu borgarar saman við Føroya Náttúru- og Umhvørvisfelag á Yvirfriðingarnevndina at friða alt økið vesturi á Víkum. Hetta er eitt øki, har Fjallavatn og økið uttan um vatnið longu er friðað. Tó høvdu felagið og borgararnir ikki rætt at verða hoyrd í málinum.

(Mynd: Sverri Egholm)

- Men aliloyvið varð givið við umhvørvisgóðkenning. Reglur eru í umhvørvisgóðkenningini um krøv, ið skulu lúkast, um óhapp er. Tó er onki krav um tilbúgvingarætlan, skrivar Ingilín D. Strøm í viðmerkingunum.

Retoriskt spyr tingkvinnan landsstýrismannin, um hann heldur, at økið vesturi á Víkum er væl egnað til aling, og eisini um ætlanir eru at tryggja at ein tilbúgvingarætlan fylgir við umhvørvisgóðkenningum til aling o.a. virksemi, ið kann hava avleiðingar fyri náttúruøkir.