Fólkaflokkurin: Nevndin í Havn rýmir eisini

Tað gongur einki serligt hjá Fólkaflokkinum. Fólk rýma í hópatali úr flokkinum, sum í gjár fekk nýggjan formann.

Nú er tað Havnar Framburðsfelag, sum er farið í sor. Øll nevndin í valfelagnum hjá Fólkaflokkinum í Havn, hevur valt at leggja frá sær.

Tað váttar Rói B. Poulsen, nú fyrrverandi formaður í Havnar Framburðsfelag, fyri útvarpinum.

Hvat nú skal henda er upp til onnur at gera av, sigur hann við útvarpið.

Í nevndini í Havnar Framburðsfelag eru Rói B. Poulsen, Regin W. Dalsgaard, Helgi D. Michelsen og Birgir Nielsen.

Fyrr í dag boðaði formaðurin í ungmannafelagnum, Erling Mørkøre, at hann legði frá sær, orsakað av rokinum rundan um flokkin.

Floksleiðslan valdi annars í gjárkvøldið einmælt at seta Beinir Johannesen sum nýggjan formann í flokkinum.