Ingi Samuelsen
Tað kom eftir øllum at døma sum ein skelkur fyri ting- og landsstýrismanningina hjá Fólkaflokkinum, at uppskotini um sammóðirskap vórðu samtykt á tingi í dag.
Tað var atkvøðan hjá Anniku Olsen, sum varð tann 17. og avgerandi.
Eitt av málunum var uppskot til samtyktar, og var sostatt endaliga avgreitt í dag. Tað er eitt uppskot um at heita á landsstýrið um at gera neyðugar broytingar í rættargangslógini.
Hini bæði málini eru lógaruppskot, og skulu tí hava eina triðju og endaliga viðgerð, væntandi seinni í vikuni.
Spurningurin er, um samgongan kann gera nakað, sum kann broyta støðuna áðrenn málið kemur til triðju viðgerð í tinginum.
Ein møguleiki er, at landsstýrisfólkini taka løgtingssessir sínar aftur.
Beinanvegin eftir tingfundin í dag, meðan Annika Olsen tosaði við miðlarnar úti í forhøllini, fóru umboð fyri samgonguflokkarnar til viks fyri at fundast um støðuna.
Í krókunum í løgtinginum varð tosað um, at Fólkaflokkurin hevur møguleikan at tvey av landsstýrisfólkunum fara aftur í tingið, sum so ger, at annað og triðja eykafólkið hjá flokkinum mugu víkja.
Tey trý fólkafloksumboðini, sum sita í tinginum nú fyri landsstýrislimirnar, eru hesi í raðfylgju: Heðin Zachariassen, Annika Olsen og Brandur Sandoy.
Vinarliga broyt tínar kennifíla - og privatlívsstillingar fyri at síggja hetta innihald