Fólkaflokkurin vil hava høllina í útboð

Fólkaflokkurin í Tórshavnar býráð tekur undir við Stórhøllini, men mælir til, at arbeiðið verður boðið út alment.

Tað boða umboðini hjá Fólkaflokkinum í býráðnum, Annika Olsen og Birgir Nielsen, frá í tíðindaskrivi í morgun. Í gjár boðaðu føroysku fólkatingslimirnir, Sjúrður Skaale og Edmund Joensen annars frá, at teir høvdu tryggja stórhøllini 30 milliónir krónur av donsku fíggjarlógini.

Skrivið hjá fólkafloksumboðunum í Tórshavnar býráð er soljóðandi:

Tað var undir býráðssamgonguni við Anniku Olsen sum borgarstjóra, at hugskotið um nýggja stórhøll kom á borið í Tórshavnar býráð. Ætlanin var at stórhøllin skuldi raðfestast í hesi býráðsetuni.

Ein slík stórhøll, sum verður til stóran frama fyri ítróttin, ferðavinnuna, mentanina, samkomulív osv., vil hava eitt ómetaliga stórt virði fyri okkara høvuðsstað og eisini fyri allar Føroyar. Ongin ivi um tað.

Vit skulu tí sláa fast, at Fólkaflokkurin sjálvsagt tekur fult undir við bygging av eini komandi stórhøll, har Tórshavnar Kommuna hevur givið tilsøgn á 109 milliónir krónur svarandi til 50 prosent av byggikostnaðinum á 218 milliónir krónu treyta av at vinnan, grunnar o.o. koma við teimum resterandi 109 milliónum krónunum.

At vinnan, grunnar og vónandi tað almenna eisini eru við at fíggja eina slíka stórhøll saman við Tórshavnar kommunu er eisini góður borgarligur politikkur, sum vit fegin vilja stuðla. 

Umboðini fyri Fólkaflokkin í Tórshavnar býráð vilja tí atkvøða fyri byggingini av stórhøllini, tá ið treytirnar fyri fíggingini eru loknar, og málið aftur kemur fyri býráðið.

Tó skulu vit boða frá, at Fólkaflokkurin greitt mælir til,  at tann fíggjarligu parturin verður innanfyri fíggjarætlanina hjá Tórshavnar kommunu, soleiðis at fult gjøgnumskygni er í fíggjarviðurskiftunum av stórhøllini.

Harnæst mælir Fólkaflokkurin í býráðnum til, at byggingin av stórhøllini verður boðin alment út til føroyskar ráðgevarar og føroyskar byggifyritøkur. Hetta skylda vit føroysku vinnuni, umframt at vit eisini tryggja at Tórshavnar kommuna, sum størsti einstaki partur av stórhøllini, heldur leiðreglurnar um at bjóða slíkar stórar byggiætlanir alment út. 

Birgir Nielsen og Annika Olsen