Fólkið ynskir ikki tjóðleikhús á bryggjuni

Tað hevur ikki undirtøku í fólkinum at byggja eitt tjóðleikhús á Eystaru Bryggju í Havn.

Tað vísir ein kanning, sum Spyr.fo hevur gjørt fyri Portalin.

Tey 500 fólkini, sum mikudagin vórðu spurd, høvdu fýra møguleikar at svara spurninginum “Hvat heldur tú um bygging av nýggjum tjóðleikhúsi?”

Bert 16 prosent av teimum spurdu halda, at “Tjóðleikhúsið skal byggjast á Eystaru bryggju, sum ætlanin er”.

Hinvegin eru tað ein góður fjórðingur – 26 prosent – sum halda, at húsið skal byggjast “aðrastaðni enn í Tórshavn”, meðan ein knappur fjórðingur – 24 prosent – heldur, at “Føroyar hava ikki brúk fyri einum nýggjum tjóðleikhúsi”.

Altso ein helmingur av fólkinum heldur – sambært kanningini – at húsið antin ikki skal byggjast ella byggjast uttan fyri Havnina.

Hin helmingurin heldur, at húsið skal vera í Havn. 16 prosent svaraðu, sum sagt, at tey ynskja húsið bygt á Eystaru bryggju, meðan størsti parturin av teimum spurdu, 34 prosent, svaraðu “Tjóðleikhúsið skal byggjast í Tórshavn, men ikki á Eystaru Bryggju”.

Hyggja vit til dømis eftir hvat veljararnir í høvuðsstaðnum halda, so taka 28  prosent undir við núverandi ætlan, meðan 44 prosent halda, at húsið skal verða onkra aðra staðni í býnum. 16 prosent halda ikki, at vit skulu hava nakað tjóðeikhús, meðan 12 prosent halda, at tað skal liggja uttan fyri høvuðsstaðin.

Heili 30 prosent av veljarunum við bústaði uttan fyri høvuðsstaðin, halda ikki, at tað er neyðugt við einum tjóðleikhúsi. 36 prosent halda, at húsið skal byggjast uttan fyri høvuðsstaðin, meðan restin tilsamans 34 prosent taka undir við, at tað verður bygd í Havn, men einans 8 prosent av hesum taka undir við verandi ætlan á Eystaru Bryggju.

Um vit hyggja eftir kynsbýtinum, so eru tað nógv fleiri menn enn kvinnur, sum ikki halda, at tjóðleikhúsið skal byggjast. 31 prosent av monnunum og 17 prosent av kvinnunum svaraðu at Føroyar ikki hava brúk fyri einum tjóðleikhúsi.

Vit síggja eisini, at tað í størri mun eru borgarligir veljarar, sum eru ímóti tjóðleikhúsi. 31 prosent av veljarunum hjá núverandi andstøðuflokkunum halda, at ikki er tørvur á tjóðleikhúsi, meðan tað bert eru 13 prosent av samgonguveljarunum, sum hava henda hugburð.

Her verður mint á, at tað var undanfarna samgonga við Jenisi av Rana sum landsstýrismanni við mentamálum, sum legði uppskotið fram um at staðseta tjóðleikhúsið á Eystaru bryggju.