Forkunnug føðingardagskonsert á Eiði

Konsertin leygardagin 9.oktober er í sambandi við, at Eiðis Ljómfelag hevur fylt 100 ár. Orkestrið varð upprunaliga stovnað í 1920, so 100 ára føðingardagurin var í fjør, men tá mátti konsertin avlýsast orsaka av koronastøðuni. Tey í Eiðis Ljómfelag hava kortini hildið, at 100 ára stovningarárið átti at vera markerað, og tað verður so gjørt við hesi konsertini.

Á skránni leygardagin verður fjølbroyttur tónleikur so sum “The Old Rugged Cross”, “Highland Cathedral”, “Så skimrande var aldrig havet” og kenda lagið “Kom og dansa” hjá Franz Lehár, sum orkestrið spælir í nýggjari útseting hjá Otniel Nygaard.

Eisini spælir orkestrið eina sirpu við 4 løgum, sum eiðismaðurin Johan Kallsoy (1892-1973) hevur skrivað, umframt lagið hjá Hans Erlandi í Brekkunum til yrkingina “Eiði mín heimbygd”, sum Óli Egilstrøð (1916-1999) skrivaði.

Serliga forvitnislig er frumframførslan av tónleikaverkinum ‘Risin’, sum Atli Kárason Petersen tónaskald hevur skrivað til orkestrið.

Orkesturleiðarar verða Oddur Magnusson Hentze og Otniel Nygaard. Forkvinna í orkestrinum er Katrin Dánjalsdóttir. Kendi miðlamaðurin Kári Sólstein, sum eisini er royndur tónleikari, verður frásøgumaður á konsertin. Konsertin byrjar klokkan 16, varðir í umleið ein tíma, og hon er ókeypis.

Eiðis Ljómfelag telur í dag umleið 25 spælarar í øllum aldri. Flestu spælarar eru av Eiði og úr Sundalagnum. Orkestrið er eitt harmoniorkestur, og tað merkir, at bæði messingblásarar og træblásarar spæla við.

Eiðis kommuna