Innanlands

Føroyar fáa nú eitt Brekumboð

Hetta varð einmælt samtykt í løgtinginum fyri løtu síðani, og tað merkir, at Almanna- og mentamálaráðið nú veruliga kann fara undir fyrireikandi arbeiði

- At seta á stovn eitt Brekumboð er eitt nýbrot fyri føroyska samfelagið, og er endamálið at betra um rættindi og kor hjá fólki, ið bera brek, sigur Sirið Stenberg. Løgtingslógin kemur í gildi 1. januar 2025 (Mynd: Sverri Egholm)

2024-03-20 11:28

Agnar Prestá

Løgtingið hevur í dag einmælt samtykt uppskotið um løgtingslóg um Brekumboð. Talan var um eitt uppskot, ið Sirið Stenberg, landsstýriskvinna í almanna- og mentamálum, legði fyri Løgtingið fyri jól.

- At seta á stovn eitt Brekumboð er eitt nýbrot fyri føroyska samfelagið og er endamálið at betra um rættindi og kor hjá fólki, ið bera brek. Tað hevur leingi verið tørvur á einum óheftum Brekumboði í Føroyum, og tí fegnist eg um at lógin varð einmælt samtykt í Løgtinginum í dag, sigur Sirið Stenberg, landsstýriskvinna.

Við nýggju lógini fær landsstýriskvinnan heimild til at seta á stovn eitt Brekumboð, og eina nevnd, sum skal ráðgeva Brekumboðnum.

Heimasíðan hjá almanna- og mentamálum skrivar eisini, at lógin ásetir, at Brekumboðið skal hava sum aðalmál at tryggja, at røddin hjá fólki, ið bera brek, gerst týðiligari í almenna rúminum. Brekumboðið skal virka fyri, verja og hava eftirlit við, at innlendis lóggáva, tænastur og tilboð eru í samsvari við ST sáttmálan um rættindi hjá einstaklingum, ið bera brek.

- Eisini skal Brekumboðið hava ein upplýsandi leiklut um rættindi hjá fólki, ið bera brek. Sum ein liður í hesum arbeiði skal Brekumboðið millum annað veita ráð og vegleiðing, um rættindi, kæru- og klagumøguleikar, og gera frágreiðingar og kanningar um viðurskifti hjá fólki, ið bera brek.

Løgtingslógin um Brekumboð kemur í gildi 1. januar 2025. Almanna- og mentamálaráðið fer nú undir fyrireikandi arbeiðið.

Kelda: ammr.fo

Vinarliga broyt tínar kennifíla - og privatlívsstillingar fyri at síggja hetta innihald