Føroyskur politikkari og miðil misbrúktur í falskari Facebooklýsing

Nú eru falskar lýsingar við kendum føroyskum persónum eisini komnar til Føroya.

- Orðini hjá Bárður á Steig Nielsen skelkaðu almenningin. Hetta er eitt avgerandi slag fyri hansara yrkisleið. Føroya bankar eru í øðini!

Soleiðis stendur at lýsa í lýsing á Facebook í hesum døgum við mynd av Bárði á Steig Nielsen í klædningi og Keypmannahavn aftanfyri seg.

Tá trýst verður á leinki við yvirskriftini "Alt landið er ørkymlað av samrøðuni í gjár" verður brúkarin beindur víðari til eina heimasíðu við navninum glossty.shop, men er latin í hamin hjá Dimmalætting.

Endamálið er greitt. Tað er at lokka pening frá fólki.

Hetta er nakað sum danskir miðlar hava gjørt vart við í eina tíð. Hjá TV2 er tað eitt nú verturin og tíðindafólkið Divya Das sum verður brúkt í slíkum falskum lýsingum. Eisini hevur Anders Lund Madsen verið brúktur.

Tað vísir seg at vera trupult hjá Meta, sum rekur Facebook, at sleppa av við slíkar lýsingar.