Framsýningar hjá Tórshavnar Kvøldskúla verða um vikuskiftið

Árliga framsýningin hjá Tórshavnar Kvøldskúla verður í Havn og í Kollafirði nú um vikuskiftið.

Tórshavnar kommuna skrivar á heimasíðu sínari, at fríggjadagin 4. apríl og leygardagin 5. apríl verður framsýningin í Müllers Pakkhúsi í Havn og sunnudagin 6. apríl í skúlanum í Kollafirði.

Elsa Berg, borgarstjóri í Tórshavnar kommunu, setir framsýningina í Müllers Pakkhúsi fríggjadagin klokkan 15. Dyrnar lata upp báðar dagarnar klokkan 12 og opið er til klokkan 18.

Mynd: torshavn.fo

Stórur partur av skránni er, at næmingar framføra ymiskt. Soleiðis verður eisini í Kollafirði sunnudagin.

Bergur Robert Dam Jensen, býráðslimur, setir framsýningina í skúlanum í Kollafirði sunnudagin klokkan 14. Dyrnar lata upp klokkan 13.30, og opið er til klokkan 18.

Mynd: torshavn.fo