Frans pávi vitjar í Kongo

Næstan ein millión fólk vórðu komin saman í høvuðstaðnum í lýveldinum Kongo, Kinshasa, tá Frans pávi í gjár kom á vitjan í landinum.

Tað skrivar BBC.

Sambært miðlinum er umleið helmingurin í fólkalýveldinum Kongo katolikkar, og er harvið størsta katólska samfelag í Afrika. Tað búgva knapt 100 milliónir fólk í DR Kongo.

Dagurin í gjár var frammanundan lýstur at vera halgidagur, fyri at so nógv sum møguligt kundu uppliva hendingina.

Pávin skuldi upprunaliga havt vitjað afrikanska landið í juli í fjør, men ferðin varð avlýst, tí pávin hevði heilsutrupulleikar tá. 

(Mynd: EPA)