Tíðindaskriv
Í dag, tann 10. august verður føroyska frímerkið nr. 1000 givið út. Hesum ger Posta nógv burturúr, og verður frímerkið avdúkað í dag á stórari framsýning í Cleveland, USA, - the Great American Stamp Show 2023.
Listamaðurin, Edward Fuglø hevur sniðgivið vakra frímerkið. Frímerkjadeildin hevur samstarvað við Edward Fuglø um nógv føroysk frímerki, og tey litu tí honum upp í hendur at sniðgeva frímerki nr. 1000.
Frímerkið myndar ein varða úti í haganum eitt summarkvøld. Huglagið er summarkent, og varðin er umgirdur av tí plantu-, fugla- og djóralívi, sum er at síggja í haganum hesa ársins tíð. Huldan og nykurin eru somuleiðis partur av myndini.
Viðurkendi norski listamaðurin Martin Mörck hevur myndrist frímerkið, sum er prentað í stálprenti og offsett. Harumframt er neon litur og serligt lakk nýtt, so tað m.a. kennist sum um at sandur er stroyddur á ein part av frímerkinum.
Ein varði kann hava ymiskan súmbolskan týdning – hann kann vera bæði vegvísari og fastapunkt. Frímerki nr. 1000 er ein varði á longu frímerkjaleiðini hjá Posta síðan 1975, tá fyrstu føroysku frímerkini vórðu givin út.
Les greinina um frímerkið á www.stamps.fo har eisini ber til at bíleggja frímerki og snøggu mappuna, sum eisini er gjørd í hesum sambandi. Í mappuni er frímerki, svartprent og bjálvi.
Posta
Vinarliga broyt tínar kennifíla - og privatlívsstillingar fyri at síggja hetta innihald