FTZ Føroyar P/F besta ár nakrantíð

FTZ Føroyar P/F er ein fyritøka, sum selur bilaeykalutir og vøruúrval til føroysk verkstøð og privat- og vinnukundar í Føroyum. FTZ er staðsett í Havn á Kamsdali. Høvuðseigarin er kenda danska fyritøkan FTZ Autodele & Værktøj A/S.

Roknskapurin fyri 2021 hjá FTZ Føroyar P/F royndist væl. So væl, at ársúrslitið gjørdist eitt avlop eftir skatt á 7,2 mió.kr. Talan er um besta úrslit nakrantíð hjá felagnum. Felagið rindar alt úrslitið, 7,2 mió.kr., út til sínar partaeigarar. 

Um hugt verður nærri eftir roknskapinum sæst, at bruttovinningurin øktist úr 14,5 mió.kr. í 2020 til 15,8 mió.kr. í 2021. Vøksturin er 9,4 prosent. 

Úrslitið áðrenn avskrivingar, eisini nevnt ebidta, var 8,8 mió.kr. í 2021, sammett við 7,6 mió.kr. í 2020, sum er ein vøkstur á 16 prosent. 

Ársúrslitið í 2021 gjørdist eitt avlop á 7,2 mió.kr. sammett við 6,2 mió.kr. í 2020, sum er vøkstur á 16 prosent. 

Fíggjarjavnin hjá FTZ Føroyar er øktur úr 25,9 mió.kr. í 2020 til 27,2 mió.kr. í 2021.

FTZ Føroyar P/F er sera væl fyri fíggjarliga, har eginognin í 2021 er 21,2 mió.kr. Trygdarevnið er tískil 78 prosent, sum verður roknað at verða sera gott. Tó verða 7,2 mió.kr. útgoldnar í vinningsbýti.

Gjaldførið er somuleiðis gott. Tøki peningurin við árslok 2021 var heili 15,2 mió.kr. Gjaldførislutfallið er 203 prosent, sum sigur, at ognir í umferð eru tvær ferðir størri enn stuttfreistaða skuldin.

Felagið hevur onga langfreistaða skuld og stuttfreistaða skuldin er 6 mió.kr. í 2021 sammett við 5,7 mió.kr. í 2020. 

Stjórar í FTZ Føroyar P/F eru Ragnar Petur Joensen og Vagnur Johannesen.  

Greiningin er gjørd av ráðgevarafyritøkuni Nira Sp/f.  www.nira.fo