Fýra nýggir tilburðir í gjár

Í gjár vóru fýra nýggir tilburðir staðfestir, vísa nýggjastu tølini hjá landslæknanum.

Ein persónur fekk staðfest smittuna við kanning tveir dagar eftir komu til Føroya, og hinir tríggir persónarnir eru smittaðir í Føroyum av kendum smittukeldum.

Átta persónar afturat eru eisini staðfestir frískir, og tí minkar talið á aktivum smittutilburðum niður í 94.

1266 kanningar vóru gjørdar seinasta døgnið. 236 persónar eru í sóttarhaldi, og eingin er innlagdur.