Alda Nielsdóttir
Sandra Day O'Connor, fyrrverandi hægstarættardómari í USA, andaðist í gjár, 93 ára gomul. Hon andaðist í heimi sínum í Phoenix í Arizona, boðar amerikanski hægstirætturin frá sambært CNN.
Hon skrivaði søgu, tá hon í 1981 gjørdist fyrsti kvinnuligi dómarin at sita í amerikanska hægstarættinum. Hon varð útnevnd av táverandi forsetanum, Ronald Reagan.
O'Connor var mett at vera ein konservativur dómari, hóast hon eisini atkvøddi saman við teimum liberalu dómarunum í ávísum málum.
Hægstarættardómarar kunnu sita fyri lívið, men O'Connor valdi at fara frá í 2006.
O'Connor varð fødd í El Paso í statinum Texas 26. mars í 1930. Sum ung las hon løgfrøði og búskaparfrøði á tignarliga Stanford universitetinum í Kalifornia. Seinastu árini hevur hon havt trupulleikar við heilsuni, og í 2018 boðaði hon frá, at hon hevði fingið staðfest demens.
Vinarliga broyt tínar kennifíla - og privatlívsstillingar fyri at síggja hetta innihald