Fyrsti rúmdartúrur uttan astronautar umborð

Tá SpaceX rúmdarverkætlanin hjá Elon Musk í nátt sendi upp enn eina rakett út í rúmdina, var hetta fyrstu ferð nakrantíð, at eitt mannað rúmdarfar varð sent avstað uttan ein útlærdan astronaut umborð.

Væleydnaða útskjótingin fór fram á Kennady Space Center hjá Nasa í Florida.

Tað er 38 ára gamli ríkmaðurin, Jared Isaacman, sum fíggjar túrin, ið hevur fingið heitið Inspiration4. Einki verður sagt um, hvat verkætlanin kostar.

Isaacman er sjálvur við á túrinum. Við sær hevur hann trý onnur: Heyley Arceneaux, sum er læknalesandi, Chris Sembrosk, sum fyrr hevur starvast í amerikanska flogvápninum, og Sian Proctor, ið er professari í jarðfrøði.

Komandi trý samdøgrini eru tey í ringrás um jørðina í rúmdarhylkinum Dragon, har tey skulu gera ymsar royndir. Men tey fáa eisini høvi at njóta útsýni yvir jørðina gjøgnum rútarnar í rúmdarhylkinum, skrivar CNN.